Blog Fox

那天,我得到了LoL金牌

那天,我得到了LoL金牌

各位,首先想講我係一名LoL (遊戲:英雄聯盟 league of legends)金牌選手,呢個故事由我仲係銅5 果時講起,我解釋下,其實所謂銅五就係係LoL 食物鏈中最低階既排名,亦都係人稱銅牌地獄。

「如是等輩,當墮無間地獄,千萬億劫,以此連綿,求出無期。」

基本上你入得銅牌,係好難升上去。 憶起當日一班朋友柴娃娃咁話組隊打LoL,我同阿文,Freaky  一齊升到30 lv,可以打排名賽了,我地決意一齊輸哂十場賽事,由銅5打起打起,人生就係要咁先有挑戰性!我就做中路隊長,阿文上路霸王,Freaky Support 神手!

但接二連三的失敗,接近兩個月的遊戲時間,一行三人晚晚玩三排也走不出銅牌地獄,剛開始大家會一起罵台服的台灣隊友雷,到後來我連自己朋友都不再相信了,因為台灣人雷,你可以罵他們87 (白痴),可以笑他們不懂英文,但 自己朋友雷呢? 我就只可以默默接受


阿文:屌,下路好撚廢,我TP(傅送)落去幫手

我:喂,你上路座塔比人打爆啦WO,同埋你蓋倫得7Lv 岩岩又放左大

阿文:得啦! 等我拎人頭

2 分鐘後,阿文負責上路既塔就被打爆,而阿文亦都無拎過任何人頭

我:….

阿文:一日最衰都係下路廢!!要我落去幫手

我:喂,Freaky ,唔好衝呀!!入到人地座塔我地兩個都會死

Freaky :得啦! 殺佢地老味!!

情急之下,正在守中路既我都落左去下路幫手

– An ally has been slain.

– You have been slain.

– Double Kill!

– Triple Kill!

銅牌路上,是孤獨的,隊友都是廢物,我好驚朋友上線叫我一齊打,我知道銅牌既朋友都係廢物,佢地都係負擔,我一個人專心做好Carry 就好了。

當然,朋友圈入面,總有些d 銀牌/金牌既朋友 ,佢地都唔會覺得我廢,總會叫我一齊打,點解? 因為之前大家30lv 前都有玩,不過佢地頭十場好認真打,我就同兩頭傻仔一齊話由銅5 升上先夠挑戰性…

無錯,同銀牌選手一齊雙排玩,玩得好開心,因為隊友差極都有一定技術與認知,輸左唔會太嬲,甚至有時會怪自己做得唔好,但係我恨,我真係好恨,當我銅4 升銅3 時,身邊人就由銀2 升銀1 ,點解? 點解我要幫佢地? 點解大家都係出咁多力,佢就銀牌升階,就黎到金牌,而我就仲係銅牌,佢地無左我,何德何能呀? 下?

排位賽後,我不再相信線上所有人,我決定要隱藏地打積分,由於LOL 無得隱藏ONLINE 上線 ,我決意申請一個新帳號,一個無人知的帳號! 一直密密升LV,課金3 陪經驗,快到30lv !當我得到我金牌時,我可以大大聲聲同我朋友講我已經金牌啦!!!

自此,我既人生除工作外就只有LOL,每晚8 點收工,我都會準時番屋企單排,打到天光5 點,每次我都會錄Game ,睇番每場既Playback ,知道自己既不足!放LUNCH 時間我會睇比賽,睇職業選手 操作,研究佢出裝走位, 我當自己係一個業餘運動員咁去訓練,日以繼夜,再夜以繼日。呢種每日都睇住自己進步既感覺好正!

半年血汗後,我終於升上金5, 我用「劫」用到真係識得飛啦,我可以大大聲聲同大家講我已經金牌,我第一件事就係搵我昔日銅牌戰友阿文。

我:喂,阿文,仲有無玩LoL?

阿文: 我無玩半年啦,on9 game ,升唔到牌唔玩啦,專心d 番工仲實際

我:….
阿文:喂!喂?

我:係囉,on9 game ,仲諗住笑你仲玩緊LoL
阿文:玩鬼,過去半年我晚晚OT ,不過好似有得升職啦,哈哈

我:….

阿文:喂喂喂?

無理由架,無理由呢個世界就係得我去著緊呢個金牌,

我:喂,Freaky ,仲有無玩LoL?

Freaky :有呀,間唔中都有玩呀

我:哈哈,同你講個秘密呀!

Freaky:…

我:喂,Freaky

Freaky: 係度

我:我LoL升左上金牌呀!

Freaky :…

我:喂喂

Freaky :哦

我:哦?

Freaky : 屌,唔係呀,阿老闆又突然話去開會

(Freaky 同埋佢d 同事傾計)

我:我升左金牌wo…

Freaky : 喂,好忙,做緊野 ,下次再講,88

係啦係啦,佢地都係半途而廢既人,意志唔夠堅定!我仲有一個金牌朋友- 阿輝,搵阿輝岩啦,我地可以雙排上白金!

我:喂,金牌輝!仲有無玩LoL?

輝:咩金牌,我半年前del 左LoL

我:…..

輝:喂!喂

我:del左?

輝:係呀,記唔記果日你話自己升極都升唔到上去,del game 算

我:係呀,你仲話我無志氣!

輝:但我番去之後,我覺得你講得好有道理,打LoL 打到白金都廢,多d 時間陪自己女朋友仲好,我家下都轉左玩傳說對決,仲有batman 玩tim 。

我:下,我有講過咩?

輝:哈哈,好似係你講,是但啦,我無玩之後個人都精神左 ,場場頭十幾分鐘係度點下點下兵真係好哂時間。

我:但你金牌wo ,你仲記唔記得當年你用阿祈爾一個FLASH 再QE 連

輝:On9, 你估我Faker 咩?不過就算我好似打職業咁日日打足十個鐘,都升唔到上去架啦,係呢,你近排玩番咩?

我:…..係呀

輝:遲d 一齊玩下傳說對決囉

我:…..下,傳說對決?

輝:咪又係lol ,好似係騰訊收購左LoL 做出黎既game

好啦,就算呢個世界無人明白,地都係半途而廢既失敗者!  我決定打比我既EX 去問,其實我有咩心事都會搵傾計,我想同講我打LoL 打到金牌! 想睇下點睇

EX:你打籃球打唔打到高比咁勁呀?

我:唔得…

EX:咁咪係囉,唔係你識打波就打到NBA,同樣,唔係你識用Keyboard 同Mouse 你就以為自己做到咩Faky

我:Faker

EX:係啦Faker ,你成熟d la, 幾廿人仲成日打機,你咁樣邊有女仔會鐘意你

我: 我

EX:唔講啦,你都唔好成日當我樹洞啦,我男朋友都唔鐘意EX 成日搵我,你都唔好再搵我啦

我:….. (腦海中出現甜密回憶,仲有因為打LoL 嘈交回憶)

電話跌下, 我眼淚留出,我望住自己呢半年黎既所有…我望住我張凌亂不堪既房間,原來呢半年黎,我除左得到一塊虛擬金牌,咩都無….

唔係架!!!! 金牌仲有榮譽感,你班被LoL 打敗既廢物,你班唔知咩叫榮辱既垃圾,無資格同我講野,我打上討論區同網友分享!!!!

我:各位,小弟我今日升上金牌啦,多多指教!

A:ON9, 我白金3

B:金牌開Post?

C:呢個討論區好小學雞

D:KDA 幾多呀?

E:我菁英

我醒了,我望住我榜上面既金牌,我發現自己呢半年黎,原來咩都無做過,人地話為左錢放棄事業,愛情,親情,友情,係一件好不智既事,而我,為左塊「金牌」而放棄所有,呢d 叫咩?   

呢一刻,我同LoL 入面既英雄一樣,跌進了那個虛空既世界,一場虛空。在那個世界中浮浮沈沈,每日都做重覆的事,回不了自己的世界。

29/06 Fox 散文

分享給朋友

Comments

comments

Leave a Comment

You may also like

Bitnami