Blog Felix

我的考車記

我的考車記

話說早排我朋友同我分享左佢精彩既考車經歷,而家係度將佢文字化俾大家睇啦

由細到大,我向來成績也比較差,就算收到成績表,看到「不合格」那刻,我也沒甚麼特別感覺

但今天這張成績表,令我十分崩潰,跆不起頭做人。因為今次呢張係考車成績表,係棍波VAN成績表呀!已經第三次,你知唔知代表咩?代表我首先要再付$1800 租師傅的車考多一次,代表我要再付$500報考試,代表我又要再付師傅每次$522學車,代表身邊朋友一定覺得我ON9, 種種壓力迎面而來,真係唔係人人受得起,因為迎接我的,是第四次考車牌,身邊朋友的極限都是三次考試為限,1 take pass 更多的是。

好啦,我開始思索自己人生,點解我要去考棍波車 ?不就是為了四個字「 男 子 氣 慨 」,不懂棍波就永遠不能感受駕駛樂趣,這句話深印在我腦海中, 好多朋友話:「你考唔到,係因為你練棍波車,練得不夠熟練」 。   但依我話,不合格原因離不開路面因素,講真,停車,開車,轉波有幾難?不就是極力子,上波,比油麼? 但好多時候,學車無遇過的情況,在考試日都會發生

第一次,我考深水埗澤安道,首先同大家講講路面知識,讓路標記──即使大路上並無其他車輛,你也必須在停車綫前停車,查看交通情況。等待至車流出現安全的空檔時,才可開車前進。

即係車停在讓路處的話,必須讓大路司機走先,待無車才能駛出。這個守則我銘記於心,堅守外線有車就不駛出。

但你點估到係考試果日,讓路處外的大路,竟然有貨車司機停低讓我行?果刻我真係不知所惜。「我係咪可以駛出去?」

「一陣駛出去佢又開車,咪變漢堡包?」

「香港地,點會有司機咁好? 」

「我知司機係好心,見我考緊牌,驚我出唔到讓路處,但我家下駛出咪違反交通規則? 」

「根據道路規矩,我是不能駛出的。」

我停底,按兵不動,敵不動,我不動。我望著大路那個好心貨車司機,望著考官,大家都好似係度等緊一件事情發情,情況就會杜琪峰電影- 槍火的那些畫面(見圖),這情況維持了20秒。

嗶!嗶!嗶! 貨車後的的士不耐煩地瘋狂響號而那幾聲響號,如像子彈發射在我身上,我見著考官在我的成績單上劃下了一個「嚴重」大剔「阻礙交通情況」,因為司機的好心與我的不懂變通,肥左。

第二次,吸收左上次的經驗,我知道做人不一定要按規矩行事,要懂得變通,我告訴自己,我唔可以衰,因為我再衰又要再花多數千元的租車學車考試費,但好境不常,誰又會想到我會衰係燈位度。

那天下午,下著微雨,在燈位前停下的我,排在第二位,在我面前的是一架學車,如事者,綠燈,我見學車作未能開動,心想不妙,應該是死火了,十多秒後他終於開動學車,但慢過烏龜走路,

我心想:如果佢再係咁慢,個燈轉燈點算?咁我係咪又違反交通規則? 果然, 當我的車正過燈位前的白線時,上面那盞燈真係轉左黃燈,「頂!」 雖然我已經反應到要急剎,但我那隻腳的反應還不夠考官快,然後

考官笑住同我講:唔準衝燈^^

我:⋯⋯

第三次,我想講阿Fox真係好煩,每次提及我不合格,他總會在我耳邊說他一take pass,我已經唔敢再同人講我考車。

今次考試途中無甚麼意外,我只想平靜地考個棍波車牌,那些有名的陷阱「呀婆亂過馬路」,「的士亂入」,「失魂學車」,全不是問題,而我的棍波轉波技巧已達到自由轉換狀態,在公路完全制霸的狀況下,我輕鬆地回到考場,準備下車, 當我腦海中浮現起有我手中持著P牌和師傅合照的畫面時。

考官問我:係咪OK?

我:係

考官下車然後跟我說:你未拉手制^^

我:⋯⋯⋯⋯

最後,我朋友考到第四次才合格,由第一次學車到合格那一天,經歷大約兩年,現在他已成為一名道路駕駛者,即是司機。我想說,那數次的失敗,造就了他今天的小心謹慎,大半年在路面上他從未出過任何意外。

在那個漫長的考試過程中,我從我朋友的身上明白到只要堅持,堅持自己果份信念,機會總有一日在你手,而過程中最大的打擊就係,不停有朋友一TAKE PASS。

(圖片中的人為我朋友)

分享給朋友

Comments

comments

Leave a Comment

You may also like

Bitnami